Leammi álbmotmeahcci oaččui dikšun- ja geavahanplána
Birasministeriija nannii Suoma stuorámus álbmotmeahccái ođđa dikšuma ja geavaheami prinsihpaid. Meahciráđđehus ráhkadii plána nu ahte dat váldá fárrui oassálastimii viidát čanusjoavkkuid ja riikkavuložiid.
Dohkkehuvvon dikšun- ja geavahanplána seailluha álbmotmeahci meahccevánddardeaddji niehkočuozáhahkan. Guovllu máŋggahápmásaš geavahus lea vejolaš boahttevuođasge ja plána doarju bohccuiguin ja eará árbevirolaš sámi kultuvrrain bargama, mii lea guvlui dehálaš. Báikki olbmuid vuoigatvuođat luondduin ávkkástallamii seilot.
Leammi álbmotmeahcis fitnet jahkásaččat sullii 10 000 háve. Fitnamat dáhpáhuvvet eanas álbmotmeahci áhpásnuvvanavádagas: Leammi leagis ja golleguovllus. Smávvahápmásaš stivrejuvvon turismadoaibma meahcis lea boahtteáiggisge vejolaš. Luondduturisma gárgehuvvo ovttas guovllu fitnodatolbmuiguin.
Áhpásnuvvanavádagas giddejuvvo earenoamáš fuomášupmi geaseáigge meahccejohtalusa dagahan vahágiid divvumii ja ođđa vahágiid caggamii. Álbmotmeahci siste manni Bárásgállá geaidnu giddejuvvo Anára ja Gihttela gielddaid ráji nalde. Álbmotmeahcis leat eará stáđásnuvvan geaseáigge fuolahusjohtolagat, mat bálvalit meahci fuolahusa, ruvkebiriid ja oamastanbáikkiid fuolahusa, dutkandoaimma, bearráigeahču ja boazobarggu.
Biranministeriija mielde plána fállá buori vuođu álbmotmeahci doaimma stivremii nu ahte dat suodjala ja seastá luonddu. Ministeriija mielde lea ákkastallojuvvon, ahte viiddes álbmotmeahcis vealtameahttun meahccejohtalus lea vejolaš sierra ákkaid geažil ja ahte lagašgiliid ássiid luondduturismma ja eará turismma fitnodatdoaimma eavttut dorvvastuvvojit. Ministeriija mielde plána dorvvasta maid gollegoaivuid lága miel vuoigatvuođaid. Birasministeriija cealká maid, ahte plána vuođul addojuvvot áigojuvvon álbmotmeahci ortnetnjuolggadus lea muddema dáfus dehálaš áššegirji máŋggaid doaimmaid stivremii.
Leammi álbmotmeahcci, mii lea Anára gielddas ja muhtin oassái Gihttela gielddas, ovddasta máŋggabeallásaččat Davvi-Sámi luonddu ja duovdagiid ja lea riikkaviidosaš ja riikkaidgaskasaš dáfus mearkkašahtti suodjalanguovlu. Leammileagi beahccevuovddit ovddastit eurohpalaš suodjalanfierpmádagas earenoamáš dehálažžan klassifiserejuvvon boreála luonddumehciid.
Dikšun- ja geavahanplána nannejuvvui 28.11.2008.
Lassidieđut:
Spesiálaplánejeaddji Elina Stolt, Meahciráđđehus, tlf. 0205 64 7714 dahje 0400 -398 983
Plána: www.metsa.fi/hks
Guovllu eará dieđut: www.luontoon.fi/lemmenjoki
