Gálddoaivvi meahcceguovllu ja Sámmotjeakki-Vadjotjeakki jekkiidsuodjalanguovllu nannejuvvon dikšun- ja geavahanplána
Birasministeriija lea 16.12.2008 nannen Suoma stuorámus meahcceguvlui ja stuorámus jekkiidsuodjalanguvlui dikšun- ja geavahanplána. Birasministeriija mielde dikšun- ja geavahanpála čuovvu 1991:s fápmui boahtán meahcceguovlolága ulbmiliid ja dat ovddida lága ollašuhttima sihke čielggasmahttá ja stivre guovllu geavaheami. Nannejuvvon dikšun- ja geavahanplána láhčá vuođu guovllu geavahanprinsihpaide ee. meahccejohtalusa, turismadoaimma ja doarjjabáikkiid mieđihanprinsihpaid hárrái.
Birasministeriija guđii nannekeahttá plánas leamaš árvalusa, mas geavahansoahpamušaid dahkan omd. guolástandoarjjabáikkiid dahje boares visttiid hárrái livččii lean vejolaš dušše báikkálaš sámiiguin. Birasministeriija ákkastallá iežas mearrádusa dainna, ahte meahcceguovloláhka lea boahtán fápmui ovdal ođđa vuođđolága ásaheami. Ná meahcceguovlolága vuođul ii Birasministeriija mielde sáhte mieđihit dákkár ovddu dušše sámiide. Birasministeriija mielas Meahciráđđehusas lea gal rivttes ulbmil doarjut plána vuođđoprinsihpain sámiid vejolašvuođaid bargat iežaset kultuvrrain.
Meahccejohtalus lea lassánan Gálddoaivvi guovllus. Birasministeriija gávnnahage ahte geasiáigásaš meahccejohtalusvuojáhagaid sajádaga ja geavaheami galggašii kártet Meahciráđđehusa ja guovddáš doaibmiid ovttasbargun. Dan vuođul sáhtášii meroštallat sierra ulbmiliidda dárbbašlaš johtolagaid ja jávkadit eret anus badjelmearálaš johtolagaid.
Birasministeriija mielde fuolastuhtti nuppástussan sáhttá atnit lastamáđu dagahan ođđa roassoguovlluid meahcceguovllu lagešvuvddiin. Guovllu dikšuma ja geavaheami dáfus lea dehálaš čielggadit roassoguovlluid viidodaga ja čuovvut daid vejolaš viiduma.
Anára ja Ohcejoga gielddain leahkki Gálddoaivvi meahcceguovlu lea viidáseamos Suoma 12 meahcceguovllus. Dan viidodat lea sullii 295 000 hektára. Ovttas Suoma viidáseamos jekkiidsuodjalanguovlluin, Sámmotjeakki-Vadjotjeakki guovlluin (viidodat 52 270 ha) ja Norgga beale guovlluiguin dat hábme sullii miljonbeali hektára viidosaš geainnuhis meahcceollisvuođa.
Guovllus barget bohccuiguin Gálddoaivvi, Njávdáma ja Muttošjávrri bálgosiid badjeolbmot. Guovlu lea sámiid ruovttuguovllus ja oassi das gullá nuortalašguvlui.
Guovllu nuortadavágeahčen mannet Čeavetjávri-Buolbmátjávri vánddardanjohtolat, Anárašbálggis ja Sámebálggis. Dálvit guovlluid čađa manni mohtorgielkávuojáhagaid geavahit sihke báikegoddelaččat ja olgobáikegoddelaččat. Guovllus leat guhtta, Meahciráđđehusa fuolahan ávdinstobu ja njeallje Villi Pohjola láigostobu.
Lassedieđut:
Meahciráđđehus, guovlluhoavda Jyrki Tolonen, tel. 0400 388 609
Meahciráđđehus, spesiálaplánejeaddji Elina Stolt, tel. 0205 64 7714 dahje 0400 398 983
Guovlluid dikšun- ja geavahanplánat ja eará dieđut guovllu birra gávdnojit čujuhusas: www.metsa.fi ja www.luontoon.fi/kaldoaivi