Inventerenovttasbarggu boađusin logit ođđa dološbázahasat Anáris
![](https://mb.cision.com/Public/MigratedWpy/80011/617095/9686430f11f00351_800x800ar.jpg)
Dieđáhus 12.11.2008
Meahciráđđehusa Sámi luonddubálvalusat ja Musealágádus inventerejedje ovttasbargguin mannan gease Anára kirkosiidda lagašguovllu ja Anárjávrri gáttiid guovlluid, mat leat lávvabarggu vuolde. Gieddebargguid boađusin bohte dihtui logit árabut dovdameahttun dološbázahasat ja eará kulturárbebáikkit.
Árabut guovllus dovde sullii čuođi dološbázahasčuozáhaga. Geasi inventerenbargguid maŋŋá doppe leat dieđus ainjuo 150 earálágan arkeologalaš čuozáhaga. Gávdnojuvvon ovdahistorjjálaš báikkiin eanemus miellagiddevaččat leat Bártteha ja Fávlejohkanjálmmi ássanbáikkit, maid áigodat lea várra geađgeáiggis dahje áraruovdeáiggis. Stuorámus oasi ođđa dološbázahasain gávdne Bárttet-Fávli –gaskasaš fiinna sáddo guovllus, mii lea oalle oiddolaš báiki ovdahistorjjálaš ássamii.
Ovdahistorjjálaš dološbázahasaid lassin guovllus dokumenterejedje máŋggaid miellagiddevaš historjjálaš áiggi kulturárbečuozáhagaid. Boares vuovdebargobarttaid bázahusaid, sámegittiid sihke nuppi máilmmisoađi áigge eanaluvvan fáŋgaleairra ráhkadusat muitalit guovllu rikkis ja maiddái lossa duogážis.
Inventeren dahkkojuvvui duogášmateriálan Anárjávrri oasseoppalašlávvii ja Anára kirkosiidda sajádatlávvii, ja daid goluid ovddasvástádus lei Meahciráđđehusas ja Anára gielddas. Inventeremis dárkkistedje ovdalis dovddus dološbázahasaid sajádaga ja dili sihke ohce ovdalis dovdameahttun dološmuittuid lávas evttohuvvon ođđa huksenbáikkiin. Lassin guorahalle ovdahistorjjálaš ja historjjálaš ássamii oiddolaš Anárjávrri sihke lagašguovlluid smávit čázádagaid gáddeguovlluid.
Inventeremis čohkkejuvvon dieđuid geavahit lávvabarggu lassin Anárjávrri vánddardanguovllu dikšun- ja geavahanplána duogášdiehtun. Guktuid inventeremiid gieddebarggu ja raporterema ovddasvástádus lei FM Eija Ojanlatvas. Musealágádusa inventeremis doaimmai veahkkedutkin HuK Piritta Häkälä.
Lassidieđuid inventeremis oažžu
Meahciráđđehus, Sámi luonddubálvalusat
Spesiálaplánejeaddji Eija Ojanlatva, t. 044 339 5113, eija.ojanlatva@metsa.fi
Kulturárbbi spesiálaplánejeaddji Pirjo Rautiainen, t. 040 508 1673, pirjo.rautiainen@metsa.fi
Musealágádus, Arkeologiija ossodat
Dutki Sirkka-Liisa Seppälä, t. 09 4050 9279, sirkka-liisa.seppala@nba.fi
Intendeanta Kaarlo Katiskoski, t. 09 4050 9268, kaarlo.katiskoski@nba.fi