Meahciráđđehus ja badjealbmát soabadallan Njellima vuovdečuollanriiddu
Meahciráđđehus ja golbma sápmelaš badjealbmá leat soabadallan eará vuoigatvuohtadásiide ja ON:aid olmmošvuoigatvuohtakomiteai ovdánan riiddus. Meahciráđđehusa ja Kalevi, Eero ja Veijo Paadara gaskka dahkkon soahpamušas lea meroštallojuvvon Njellima guovllu stáhta eatnamiin guovlluid, gos Meahciráđđehusas lea vuovdedoallu ja nuppi dáfus báikkiid, gos eai čuola čuovvovaš 20 jagi áigge. Seamma soahpamušain goabbáge oassebealli mearrida heaittihit buot vuoigatvuohtadoaimmaid nuppiidasaskka vuostá.
Soahpamuš heaittiha maiddái ášši gieđahallama ON:a olmmošvuoigatvuohtakomiteas, go Paadar vieljažat gesset eret olmmošvuoigatvuohtakomiteai dahkan váidaga. Jagi 2005 álgán gearretdoaimmaid vuođđun lea leamaš Paadar vieljažiid oaidnu, man mielde Meahciráđđehusa doaimmat bohccuid guohtoneatnamiin heajudit čielgasit gánnáhahttivuođa Njellima guovllu boazodoalus, man vuođđun lea friija guođoheapmi. Vieljažat balle, ahte jus vuovdečuollamat joatkašuvvet de dat mearkkaša loahpa Njellima siiddastallamii vuođđuduvvi boazodollui. Dán dihtii Paadar-vieljažat gáibidedje dikkis, ahte vuovdečuollamat gildojuvvojit dihto osiin Anáris Njellima guovllu dálveguohtumiin. Riiddu guovddáš áššin leamašan dálveguohtuma reahkkán. Meahciráđđehusa mielas gáibádusain ii lean vuođđu. Lappi gearretriekti hilggui badjelaš jahki áigi Paadariid váidalusa, man maŋŋá sii váidaledje áššis Roavvenjárgga hoavvariektái. Go oassebealit leat soahpan áššis ja hoavvariekti lea nannen dán soahpamuša, de nohká riidoášši gieđahallan buot vuoigatvuohtadásiin. Soahpamuša mielde Meahciráđđehus biehttala vuovdečuollamiin árabut gieđahalakeahtes vuvddiin 20 jagi áigái. Vuovdedállodololaččat gieđahallon vuvddiid lea vejolaš čuollat ja dikšut measta dego dábálaččat. Dán soabadallansoahpamušas leat meroštallan vugiid dárkileappot. Soahpamuš guoská dábálaš vuovdedoallodoaimmaid. Nuortalašlágas oaivvilduvvon muorraváldima ja eanageavaheami dát soahpamuš ii ráddje, iige earret eará guolásteami, meahcásteami dahje meahccejohtolaga. Goappáge oassebeali mielas soahpamuš lea mearkkašahtti. “Mii leat hui duđavačča go beasaimet soahpamuššii, mii dahká vejolažžan árbevirolaš boazodoalu joatkašuvvama Njellimis. Boazodoallu lea midjiide eallinvuohki ja sáhttit dál buriin mielain máhccat dasa”, Kalevi Paadar dadjá. “Meahciráđđehusa dáfus soahpamuš dorvvasta bargoráfi ja dáhkida, ahte sáhttit joatkit vuovdedoalu hárjeheami ráddjejuvvon vugiin maiddái Njellima guovllus. Dát lea buorre kompromissačoavddus.”, dadjá vuovdedoallohoavda Pertti Heikkuri Meahciráđđehusas. Mielddusin lea maiddái nuortalašgielat dieđáhus. Lassidieđut: Kommunikašuvdnahoavda Juha Mäkinen, Meahciráđđehus, GSM 040 570 9307 Vuovdedoallooaivámuš Pertti Heikkuri, Meahciráđđehus Davvi-Sápmi, GSM 0400 296 613 Guovlluoaivámuš Kirsi-Marja Korhonen, Meahciráđđehus, GSM 0400 300 861 Paadariid beales: Ášševuoddji Johanna Ojala, GSM 0400 879 711