NUORTA-ANÁRA BÁIKENAMAT RÁDJUI
Viiddis Nuorta-Anára báikenamaid čielggadanbargu lea gárvvásmuvvan. Oassi Anára dovdoseamos báikkiin gávdno čielggadusas njealji gillii. Oktiibuot čielggadeamis leat báikenamat lagabui 8000 stuhka. Dál dahkkojuvvon čielggadeapmi gokčá ee. guovlluid Váhčiris máttas gitta Soađegili rájá rádjai sihke Anára vánddardanguovllu. Ilmari Mattus ollašuhtii barggu Meahciráđđehusa Sámi luonddubálvalusaid bargogohččosiin. Bargu gullá oassin suodjalanguovlluid dikšumii ja geavaheami plánemii sihke sápmelaš kulturárbbi gáhttemii, mas Meahciráđđehus bealistis guoddá fuola.
Buohkanassii čielggadeamis leat lagabui 8000 báikenama, main s. 4500 leat nummarastojuvvon ja merkejuvvon kártii. Anára dovdoseamos ja muhtun Čeavetjávrri guovllu báikenamat leat njealji gillii: suomagillii, anárašgillii, nuortalašgillii ja davvisámegillii. Suomagielat namat leat 4190, anárašgielat 3265, nuortalašgielat 380 ja davvisámegillii 61.
Čielggadeami dahkan Mattus muitala barggu birra ná: “Go guorahallá Nuorta-Anára suomagielat báikenamaid heivehanjorgalusaid suomagillii, de veagalge boahtá millii, ahte namain dahkkon heivehusat fuonášit ja njulgestaga badjelgehččet originála namaid mearkkašumi. Ovtta oasis dát čálus geahččala máhcahit originála namaid sajádaga ruovttoluotta ja dan bokte sámegielaid árvvusatnima. Mu bargun ii dán čállosis lean jorgalusaid dahkan, muhto baicce čielggadeapmi, ahte mas iešguhtege báikenamma lea ožžon nama, ja maid dat mearkkaša.”
Sámeguovllus leat dán ovdal gárvánan nammačielggadeamit Ohcejohkii ja Anárii Muotkkeduoddara meahcceeanaguvlui, ja Leammijoga álbmotmeahccái. Suodjalanguovlluid birastahtti dállodoallovuovddit leat biddjon sisa čielggadusaide. Anára guovllus váilu Bátneduoddara guovlu ja dat kártejuvvo dikšun- ja geavahanplána beaivádeami oktavuođas.
Nuorta-Anára nammačielggadeami lea ulbmil oažžut almmustahttot jagi 2009 áigge. Dán maŋŋá preanttus boahtá leat buohkaid oažžumis Meahciráđđehusa fierbmebálvalusas (www.metsa.fi). Dassážii čielggadeapmái sáhttá oahpásmuvvat Meahciráđđehusa Avvila áššehasbálvalusbáikkis (t. 0205 64 7701) ja Davvi-Sámi luondduguovddáš Siiddas (t. 0205 64 7740).
Lassidieđut:
Ilmari Mattus, puh. GSM 040 520 9249
Spesiálaplánejeaddji Elina Stolt, Meahciráđđehus, puh 0205 64 7714, GSM 0400 398 983