Váhčira meahcceguovllu dikšun- ja geavahanplána maiddái sámegillii
Meahciráđđehus almmustahtii Váhčira meahcceguovllu dikšun- ja geavahanplána mannan jagi loahpas maiddái sámegillii. Dát lea nubbi dávvisámegillii almmustahtton dikšun- ja geavahanplána. Plána lea oažžumis dušše fierbmepublikašuvdnan.
Almmustahtton 28.1.2009
Meahcceguovlolága (62/1991) mielde Meahciráđđehus lea dahkan Váhčira meahcceguovllu dikšun- ja geavahanplána, mainna geahččalit seailluhit guovllu meahcceguovloiešlági, dorvvastit luondduealáhusaid ja dorvvastit sámekultuvrra ja ovddidit luonddu máŋggabealat anu ja dan vejolašvuođaid. Meahcceguovllu dikšuma ja geavaheami čuovvuma várás árvaluvvo bissovaš proseassa bissovažžan oaivvilduvvon mearrádusaid sadjái. Dát oaivvilda dan, ahte plána galgá sáhttit dárkkistit 10–15 jagi gaskkaid dahje dávjjitge, ja dát dárkkisteapmi galgá dáhpáhuvvat oassálasti plánema prinsihpa vuođul. Goittotge plána váldoprinsihpat leat oaivvilduvvon nu bissovaš mearrádussan go vejolaš.
Váhčira meahcceguovlu lea Suoma viđadin stuorámus lágasmearriduvvon meahcceguovlu, man
viidodat lea lagabui 156 000 hektára. Váhčira meahcceguvlui lea viehka váttis beassat. Sivvan boaittobealevuhtii lea vuosttažettiin Anarjávri guhkes vuonaidisguin, Norgga ja Ruošša
rájit, váttislágan eatnamat ja geainnuhisvuohta. Váhčira meahcceguovlu gullá buorre muddui beahcevuovdeavádahkii. Meahcceguovllu máttageahčen, Kessis, beahcevuvddiin leat 1920-logus čuhppojuvvon eret stuorámus muorat ng. čoakkildančuohppamiin. Muoradahkii ja dan dikšumii ja geavaheapmái guoskevaš vuovdedoallu -logu čuoggá birasministeriija ii nannen dan hámis, muhto teavstta sadjái boahtá dikšun- ja geavahanplána beivenčuvvosa ođđa árvalus. Árvalusas buktojuvvo ovdan ahte Váhčira meahcceguovllus ii čuhppojuvvo iige vuvdojuvvo muorra vuovdeindustriija dárbbuide. Ruovttudárbomuora sáhttá vuovdit plána vuođđoprinsihpaid mielde guovllu ássiide ja barttastalliide.
Váhčira meahcceguovlu ii leat buiga meahcci. Meahcceguovllus leat mealgat badjel čuohte
ássanvistti. Priváhtaeatnamat eai gula meahcceguvlui. Eatnašat visttiin leat áigodatanus.
Guovllu stuorámus bálgosat leat Báhčaveadji ja Váhčir. Muttošjávrri bálgosa nuortamáttageahči
gullá meahcceguvlui, seammágo sneaida Njávdáma bálgosis. Ruovttudárbo- ja ámmátguolástus dáhpáhuvvá eanaš Anárjávrris. Dálvvi áigge guolástit maiddái siseatnama jávrriin. Meahccebivddu váldoguovllut leat Anárjávrri gáddeeeatnamiin. Váhčira guovllus bivdet vuosttažettiin čuvččáid, rievssahiid ja ealggaid. Áhpásmuhttingeavaheaddjit ja luonddumátkkálaččat johtalit eanaš Anárjávrri birrasiin ja dan gáddeeeatnamiin nu, ahte geavahit dárbbu mielde priváhtagámppáid ja Meahciráđđehusa fuolahan stobuid. Vánddardeaddjit leat uhccán; dábálaččat sii johtet Báhčaveaji geainnu geažis Čeavetjávrái.
Váhčira meahcceguovlu gullá ollásit sámiid ruovttuguvlui. Dasa lassin guovlu gullá
measta ollásit nuortalašlága (259/1995) 2 §:s oaivvilduvvon nuortalašguvlui, gos
nuortalaččain leat guoskevaš lága dorvvastan sajádat ja vuoigatvuođat.
Birasministeriija nannii Váhčira dikšun- ja geavahanplána 22.10.2007.
Lassedieđut: Spesiálaplánejeaddji Elina Stolt, Meahciráđđehus, tlf. 0205 64 7714 dahje 0400 398 983.
Guovlluid dikšun- ja geavahanplánat ja eará dieđut Váhčiris: http://www.metsa.fi/ ja Váhčira meahcceeana (http://www.luontoon.fi/page.asp?Section=6086i)
Govva: Váhčira meahcceguovlu lea Suoma viđadin stuorámus lágasmearriduvvon meahcceguovlu, man viidodat lea lagabui 156 000 hektára. Geainnohisvuođa ja váttislágan eatnamiid dihte Váhčira meahcceguvlui lea viehka váttis beassat.
Govven: Tapio Tynys
