Vuvdojuvvon rievssatlobiid mearri gahčai goalmmádassii
Rievssatbivdu álgá Davvi-Sámis sotnabeaivvi. Meahciráđđehus lea vuovdán dán čavčča bivdobadjái 1800 lohpejándora, mii lea goalmmádas diimmá ektui. Smávvafuođđoraportta mielde ng. turistabivdiid oassi Davvi-Sámi rievssatsállašis lei vihtta proseantta mannan jagi.
Almmustahtton 18.9.2009 Rievssatbivdu álgá Davvi-Sámis sotnabeaivvi. Meahciráđđehus lea vuovdán dán čavčča bivdobadjái 1800 lohpejándora, mii lea goalmmádas diimmá ektui. Smávvafuođđoraportta mielde ng. turistabivdiid oassi Davvi-Sámi rievssatsállašis lei vihtta proseantta mannan jagi. Dán čavčča rievssatbivdu bistá Davvi-Sámis dušše 11 beaivvi, 20.-30.9. gaskasaš áigge. Meahciráđđehus bijai Anárii, Ohcejohkii ja Eanodahkii vuovdimassii 4200 lohpejándora. Lohpevuovdin álggii borgemánu 31. beaivvi, ja moadde beaivvi ovdal rievssatbivddu álgima lobit ledje vuvdon sullii 1800 lohpejándora. Veardádallama dihtii jagi 2008 vuvdojuvvojedje oktiibuot 5476 lohpejándora ja sálašalmmuhusaid vuođul turisttat báhče 2457 rievssaha. Dutkamuša mielde Meahciráđđehusa vuovdán lobiiguin báhččojuvvon rievssahiid oassi lea Davvi-Sámi jahkásaš rievssatsállašis moadde proseantta. Mannan jagi ng. turistabivdiid sálaš oppalašsállašis lei vihtta proseanta. Dieđu vuođđun lea Fuođđo- ja guolledoalu dutkanlágádusa Davvi-Suoma smávvafuođđoraporta, mii lea aiddo gárvvásmuvvamin. Dan vuođul jagi 2008 rievssatsálaš, mii sisttisdoallá maiddái vejolaš gironsállaša, lei meahcástuslága 8 §:s oaivvilduvvon guovllus 27 900 lotti. Dáinna guovlluin oaivvildit Lappi letnii gullevaš gielddaid sihke Kajaani, Hyrynsalmi, Kuhmo, Guossáma, Paltamo, Pudasjärvi, Puolanka, Ristijärvi, Sotkamo, Suomussalmi, Taivalkoski, Vaala dahje Vuolijoki gielddaid. Dáid gielddaid olbmuiguin lea gielddalažžan vuoigatvuohta meahcástit ruovttugielddastis stáhta oamastan eatnamiin. Meari dáfus eanemus rievssahat bivdojuvvojedje Davvi-Sámi viiddis guovllus, oktiibuot 23 650 rievssaha. Davvisuopmelaš meahcásteaddjit, geain lea friija meahcástanvuoigatvuohta ruovttugielddas guovllus bivde rievssatsállašis 95 %. Jagi 2003 rájes rievssatsálaš lea njiedjan dutkamuša mielde buot guovlluin ja buot bivdojoavkkuin oktiibuot 71 proseantta. Rievssat ealáska, muhto nálli lea ain fuotni Dán čavčča nállečuovvun čájehii, ahte rievssat lea badjáneamen nállemolsašuddama mannan jagi bárrovuođus, muhto lottit leat ain unnán. Loddebeatnagiiguin dahkkon dárkilut lodderehkenastin čájehii, ahte Ohcejogas ja Anáris leat eanet rievssatbessodagat ja nálli lea ealáskeamen. Maiddái Eanodagas nálli lea nuorasmuvvan ja nanosmuvvan. Ohcejogas rehkenastit áice dán jagi 0,6 rievssaha kilomehteris. Dávisteaddji lohku lei mannan jagi 0,3. Anáris rievssatáiccut lassánedje 0,5 rievssahii kilomehteris, diimmá 0,15 rievssahis. Eanodagas rehkenastit áice 0,54 rievssaha kilomehteris mannan jagi 0,44 rievssaha sajis. Meahciráđđehus sávvá meahcásteddjiin mášolašvuođa, vaikke rievssatnális leat ealáskeami mearkkat. Eandalii “eadneloddenáli” galggašii geahččalit seastit ja meahcástit baicce nuorra lottiid ođasmuvvi náli. Meahcástusáiggi ráddjemiin ja lobiid smávva jearu dihtii rievssatnáli sáhttá vuordit máhccat johtileappot dábálaš dási guvlui. Lassidieđut: Badjedárkkisteaddji Ahti Putaala, Meahciráđđehus, tel 0205 64 6619 (fáhtemis 18.9.2009 rádjái) Guovlluoaivámuš Pirjo Ilvesviita, Meahciráđđehus, tel 0205 64 7123 (fáhtemis 21.9.2009 rájes)